حبيت اقولهالك بنفسى..بقلمى(صابر)

حبيت اقولهالك بنفسى..
إنى اسفه ..مش قادره اكمل..
خدعنى ظنى وخانى حسى..
مابقتش عارفه.. اكدب واطوّل..
مابقتش قادره..اصبر واتحمل..
واغفر واسامح ..كده زى الاول..

ماقبلتش ابعتلك صحاب..
او كلمتين منى ف جواب..
وافتح ف باب..لوم او حساب..
نقف هنا ..وبلاش عذاب..
ونفترق.. من غير عتاب..
نبعد ونبقى..زى الصحاب..

بقينا قصه بدون عنوان..انا ف مكان وانت ف مكان..
حتى اللى بينا دا حب وكان..مالوش اثر وكأنه ماكان..
ولا فيش معنى لشىء يجمعنا ونسّميه..
ضاع من بينّا احلى مابينّا نكابر ليه..
انت ف وادى وانا ف وادى فاضل ايه..
كل الماضى بقى شىء عادى ح نكدب ليه..

شفتك حبيب وانت ماشفتش غير نفسك انت وراحتك بس..
وانا بعد حبك ماعرفتش ف الدنيا إلا غرامك بس..
وكل غالى وهبتولك لكن رخص من غير ماتحس..
مع إنى لما اديتهولك ..حلفت إنك ليا وبس..

مابقتش اللى انا بتمناك..وانا مش زى ماكنت معاك..
ضاعت كل حاجاتنا الحلوه..والحنيه اتقلبت قسوه..
مش ح نكمل وخلاص اسفه..وبقولها وانا مش عارفه..
ح ابتدى بعدك وحدى ازاى..
تايهه ومقهوره ومش شايفه..ماانكرش إن انا فعلا خايفه..
اعيش من بعدك عمرى الجاى..
بس ارحم انتهى دلوقت.. افضل مايعدينى الوقت..
واكره نفسى لو يوم فوقت..ماالقاش جنبى حبيب ولا حد..
حبيت اقولهالك بنفسى..
جتنى شجاعه..وماصدقت

» حبيت يومين..بقلمى(صابر)
» ندمتنى علشان حبيت..بقلمى(صابر)
» انت آسف..بقلمى(صابر)
» من بره بس..بقلمى(صابر)
» كله منك..بقلمى(صابر)