حاجات مابينا..بقلمى(صابر)

موضوع: حاجات مابينا..بقلمى(صابر) 13/03/11, 09:38 pm

حاجات مابينّا..

كل اللى بينّا بيغفرلك لمّا ماتسألش..
حاجات مابينّا تنوب عنك علشان ماازعلش..
مع إنى مش بزعل منك علشان ماقدرش..
وروحى فيك..تسأل ..تبعد..مابتتغيرش..
حاجات مابينّا..
ماكنش فيها حد غيرنا..

كلام وكنا رددناه..
واحنا سوا يومها وقلناه..
وناس شافونا مقابلين بعض..
م الخوف جرينا طير ع الارض..
ويوم ماكانت مطره وبرد..
وجريت لحضنك خوف م الرعد..
حاجات مابينّا..
ماكنش فيها حد غيرنا..

وانت بتمسح بايديك شعرى..
وتخلى إيدك على ظهرى..
وانا اشد نفسى بعيد عنك..
واغضب عليك وازعل منك..
حاجات مابينّا اكبر بكتير..
من البعاد او م التفكير..

مش بالضروره تبعت حد..
ومش ضرورى يجينى رد..
فى شوق مابينّا بعيش عليه..
وشعور بصبر نفسى بيه..

ذكرى بتخلينى اضحك..
مهما أكون زعلانه اسامحك..
واسحب نفسى وحدى ف اوضتى..
على نور دمعه.. احكى وافضى..
وافكر نفسى بقعده جميله..
لسه ف بالى زى الليله..
وانت قاعد ف إنتظارى بشوق ملهوف..
وانا جيالك كلى حيره وكلى خوف..
وآما اقرب لك ودايبه م الكسوف..

كل همك لحظه تمسك فيها إيدى..
يبقى نفسك كلمه تسمع منها صوتى..
وانت طاير من وجودى..
تسأل وتستنى ف ردودى..
حتى المنديل اللى ف ايدى اخدته تشيله..
تذكار عشان مسكاه ايدى وامسك غيره..
منديل ورق..بقى شىء غالى من حبه فيا وتفكيره..
كل الحاجات دى..
محفوره عندى..ماتتقدرش..
بتهون البعد عليا وحبيب عينيه مابيسألش..
روحى فيك..تسأل..تبعد..مابتتغيرش..
حاجات مابينّا ماتتقدرش..
بتخلى بُعدك شىء ماحصلش..
وتخلى حبك مابينقصش..
حاجات مابينّا بتغفرلك..لمّا ماتسألش

» حاجات بسيطه..بقلمى(صابر)
» لو كنت زيك..بقلمى(صابر)
» كل يوم..بقلمى(صابر)
» ليا حق..بقلمى(صابر)
» كان من حقك..بقلمى(صابر)