و الله وشبت يا عبد الرحمن... عجزت يا واد؟ ما أسرع..؟ ميتى و كيف ؟ عاد أللى يعجز فى بلاده غير أللى يعجز ضيف!! هلكوك النسوان؟ شفتك مرة بالتليفزيون ومره ورونى صورتك فى الجورنال قلت : كبر عبد الرحمن ! أمال أنا على كده مت بقى لى ميت حول !! والله أنا خايفه يا ولدى القعدة تطول مات الشيخ محمود وماتت فاطنة أب قنديل وأتباع كرم (أب غلبان ) وأنا لسه حيه وباين صاحية كمان..وكمان!! عشت كتير... عشت ألــ حد ما شوفتك عجزت يا عبد الرحمن وقالولى .. قال: خلفت!! وأنت عجوز خلفت يا خويا؟!! وبنات كمان..؟ أمال كنت بتعمل أيه طيلة العمر أللى فات؟ دلوقتى ما فقت ? وجايبهم دلوك تعمل بيهم أيه؟ على كل حال.. أهى ريحة من ريحتك ع الأرض يونسو بعض.. ماشى يا عبد الرحمن..! اهو عشنا وطلنا منك بصة وشمة.. دلوك بس.. ما فكرت فــ (يامنة ) وقلت (يا عمه )؟ حبيبى أنت يا عبد الرحمن والله حبيبى... و تتحب على قد ما سارقاك الغربة لكن ليك قلب مش زى ولاد الكلب اللى نسيونا زمان !! حلوه مرتك..وعويلاتك ؟ والا شبهنا ؟ سميتهم أيه؟ قالولى: (أيه... ونور) ما عرفتش تجيب لك حتة واد ؟؟ والا أقولك : يعنى اللى جبناهم .. نفعونا فى الدنيا بأيه ؟ غيرش الأنسان مغرور !!! ولسه يامنه حتعيش وحتلبس لما جايب لى قطيفه وكستور؟ كدت أديتهمنى فلوس أشترى للركبه دهان أباى..ما مجلع قوى يا عبد الرحمن طب دنا ليا ست سنين مزروعة فى ضهر الباب لم طلو عليا أحبه ولا أغراب خليهم.. ينفعوا.. أعملهم أكفان كرمش.. وشى !! فاكر يامنه...وفاكر الوش؟ أوعى تصدقها الدنيا غش فــ غش !! اذا جاك الموت يا ولدى موت على طول اللى تخطفوا فضلوا أحباب صاحيين فـ القلب كأن محدش غاب واللى ماتوا حته..حته ونشفوا وهم لسه حيين حتى (سلام عليكم ) مش بتعدى من بره الأعتاب!! اول ما يجيك الموت..أفتح أول ما ينادى عليك..أجلح أنت الكسبان.. أوعى تحسبها احساب ولا واد... ولا بت ده زمن...يوم ما يصدق..كداب!!! سيبها لهم بالحال والمال وأنفد أوعى تبص وراك الورث تراب وحيطان الأيام طين وعيالك..بيك موش بيك عايشين!! يوووووه...يا زمن مشوار طولان... واللى يطوله يوم عن يومه يا حبيبى حمــــــــار !! الدوا عاوزاه لوجيعة الركبه مش لطواله العمر اوعى تصدق الوانها صفر وحمر مش كنت جميلة يا واد.. مش كنت..وكنت وجدعه تخاف منى الرجالة لكن فين شوفتونى كنتو عيال !! بناتى (راضية ) و(نجية) ماتوا وراحوا وأنا اللى قعدت طيب يا زمان !! اوعى تعيش يوم واحد بعد عيالك اوعى يا عبد الرحمن فى الدنيا وجع وهموم اشكال و الوان الناس ما بتعرفهاش أوعدهم لو هتعيش بعد عيالك ما تموت ساعتها بس هتعرف ايه هو الموت اول ما ييجى لك نط لسه بتحكى لهم بحرى حكاية (فطنه وحراجى القط)؟ أباى..ماكنت شقى وعفريت من دون كل الولدات كنت مخالف... براوى وكنت مخبى فى عينيك السحراوى تمللى حاجات زى الحداية.. تخوى الحاجة وتطير من صغرك بصوافر واعره ومناقير!! بس ما كنت كداب وادينى استنيت بالدنيا لما شعرك شاب!! قدم البيت اتهدت قبله بيوت وبيوت واصيل هوه مستنينى لما أموت هتيجى العيد الجاى واذا جيت.. حاتجينى الجاى؟ وهتشرب مع يامنه الشاى؟ حاجى يا عمه.. وجيت.. لا لقيت يامنه ولا البيت!!!
موضوع: عبد الحمن و عمته يامنه 
14/07/08, 09:51 am
