لسه بينا فيه حاجات

موضوع: لسه بينا فيه حاجات 04/08/10, 12:30 pm

أهرب منى..وأبعد عنى..
مش ح أنطقها وأقول دا ظالمنى..
صابره وأشوف آخرتها معاك..

روح وغير يوم ميلادك..
أنسى كل تاريخ حياتك..
خلص كل جفاك وآساك..

بس لما تشوف مرايه..
ح أبقى أنا.. وأنت ورايا..
مش راح أسيبك ..أتحداك..

بين عينيك حتلاقى صورتى..
والسكون دا برضه صمتى..
كل لحظه ح أكون معاك..

واللى ف ودانك دا صوتى..
وف خيالك طيف وجودى..
مش ح ترتاح غير بموتى..
وبعد موتى.. روحى ح ترفرف وراك..
لسه بينا فيه حاجات..

شلتنى من جوه قلبك..بس أنا شيلاك ف روحى..
سيبتنى مجروحه بعدك..بس أنا سيبالك روحى..

أنت باعدنى كتير عن فكرك..وأنا فكراك بدموعى ونوحى..
مستكتر انى أقربلك..وبتبعد وتقوللى روحى..
فين أروح..عمرى جنبك وأنت جروحى..
لو ودعتك..أودع روحى..

لسه بينا فيه حاجات..أفتكرهالى ساعات..
قول دى كانت غاليه عندى..
قول دى كانت ليا وحدى..
قول أنا اللى رفضت بختى..

تهرب وتنسى مهما تنسى.. ماتنكرش..
لسه باقى حاجات مابينا ماانتهتش..
ذكريات كل اللى بينا مااتنسيتش..
هدها وجور عليها..
اقطف الورد اللى فيها..
مهما تتجنى عليها..
باقيه والاحساس ماليها..
يمكن انت ظلمت فيها..
بس انا.. قلبى مراعيها..

اجرح فى عمرك القديم..
مهما تنكر كان جميل..
ولسه بينا فيه حاجات..

........
اذا أقتبست كلماتى ووضعتها بأى مكان أخر
فضع بجوارها أسمى لأنى سوف أتعقبك

» الكلام بينا إنتهى
» بتدور بينا السنين
» الفرق اللى بينا..بقلمى(صابر)
» حاجات كتير
» حاجات بنات كيوت